Guddiga Garsoorka, Arrimaha Diinta iyo Awqaafta, Xuquuqul Insaanka, Haweenka iyo Carruurta ee Aqalka Sare ee Baarlamaanka Federaalka Soomaaliya, ayaa maanta yeeshay kulankoodii ugu horreeyay, kaas oo diiradda lagu saaray diyaarinta akhrinta labaad ee Hindise-sharciyeedka Burcad-badeedda iyo Ka-hortagga Afduubka.
Kulanka oo ay shir guddoomisay Guddoomiyaha Guddiga, Senator Naciima Gadhwayne, ayaa waxaa ka qeyb galay xubnaha Guddiga, sharciyaqaannada Golaha iyo khubaro sharciyeed oo ka socday Somlaw oo cilmi-baadhis sharciyeed ku soo sameeyay sharcigan, ayaa bandhig u sameeyey xubnaha guddiga si ay uga helaan aragtiyo wax ka taraya turxaan bixinta sharciga.
Kulankan ayaa qeyb ka ah dadaallada Guddigu ugu jiro diyaarinta iyo horumarinta Hindise-sharciyeedka, si loo hubiyo in uu waafaqsan yahay baahiyaha dalka iyo heerarka sharciyeed ee caalamiga ah.
